අවුරුදු 18 ක්‌ වයසැති ගැබිනි බිරිඳගේ දරු ගැබ විනාශ කිරීමට බලකරමින් බලහත්කාරයෙන් වේදනා නාශක පෙති 15 ක්‌ එකවර පොවා කොසු මිටක්‌ කැඩෙන තුරු එම ගැබිනි බිරිඳට පහරදීමේ චෝදනා සම්බන්ධයෙන් අධිකරණ නියමයෙන් ඉකුත් 25 වැනිදා සිට රිමාන්ඩ් භාරයේ පසුවන සැකකාර සැමියාට ඇප ලබාදීම ප්‍රතික්‍ෂේප කළ මිනුවන්ගොඩ මහෙස්‌ත්‍රාත් සහ දිසා විනිසුරු ශිලනි චතුරන්ති පෙරේරා මහත්මිය සැකකරුව ලබන 16 වැනිදා දක්‌වා තවදුරටත් රිමාන්aඩ් භාරයේ තබන ලෙසට 03 වැනිදා නියම කළාය.
මිනුවන්ගොඩ ජාපාලවත්ත ප්‍රදේශයේ පදිංචිකරුවකු වන වෑවලගේ චාමර දනන්ජය නමැති සැකකාර සැමියාව මෙසේ රිමාන්ඩ් භාරයට පත් කෙරිණි.
සැකකරු පහර කෑමට ලක්‌ව සිටින කාන්තාව සමග මීට මාස 04 කට පමණ පෙර විවාහ වී ඇති බවට අධිකරණයේදී සඳහන් විය.
පහර කෑමට ලක්‌වීමෙන් අනතුරුව රෝගීවූ කාන්තාව මීගමුව මහ රෝහලේ නේවාසිකව ප්‍රතිකාර ලබාගත් වෛද්‍ය වාර්තා සහ ඇය එක්‌ මසක ගැබිනියක්‌ බවට වූ වෛද්‍ය වාර්තා අගතියට පත් පාර්ශ්වය වෙනුවෙන් පෙනී සිටි නීතිඥ ප්‍රියන්ති ලියනආරච්චි මහත්මිය අධිකරණය හමුවට ඉදිරිපත් කරනු ලැබීය.
සැකකරු වෙනුවෙන් පෙනී සිටි නීතිඥ සරණ කරුණාරත්න මහතා චෝදනා ප්‍රතික්‍ෂේප කරමින් සැකකරුට ඇප ඉල්ලා සිටියේය. මිනුවන්ගොඩ පොලිස්‌ ස්‌ථානයේ පොලිස්‌ කොස්‌තාපල් අනුර කුමාර (34588) නිලධාරියා පැමිණිල්ල මෙහෙයවිය.
